Bangteng Adi'n Hun A Om

"Ka unaute aw, na ginna uh ze-etna in kuhkalna a siam chih thei in, khemna chiteng na tuah chiang un kipahna ngen in sim un. Na ginna ze-etna un kuhkalna a siam chih thei in." - Jakob 1:2-3

I hinkhua ah khemna tuak lou leh thil hih khiallou ki om lou hi. Hun haksa i tuah te tungtawn in Pathian in pichinna, diktatna leh a itna a hon lak hi. Hichi bang hun haksate' ki tuak ngeikei leh i ut luat ahi, himahleh hiai bang hunte om lou hileh mahni hoih kisakna in i pumdim ding ua, dik kisakna bang, ki letsakna te in hon zui ding a Pathian leng ki poimoh lou lai ding hi.

Leitung a nuamsa ding a om i ki sak khak ding thil lauhhuai hi. Nop i sak hun om zel ding a, idah hun leh i lungkham hun hong om zel ding hi. Hiai te i buuk siam a ngai mahmah hi. Nuamsa den ding a leitung a om ihi cia i ki ngaihsun khak chiang in, lungkhamna leh haksatna te' thuak haksa kisa pahpah hi. Eklisiasti 3 na ah bangteng adia hunbi om ahih dan leng chiangtak in i mu thei hi.

Haksatna i tuah te'n i hatlouhna, i dinmun leh i hih na te hon theisak in, ei ah ki bawl hoih na ding hon sinsak hi. Hiaite tungtawn in midangte' theihsiamna bang, ei i ki it bang a midangte it theihna lungtang ki nei hi. I tangteel a Jakob in agen bang in hichi bang hunte chu kipahna ngen in sim un ana chi hi, hiai te'n Pathian a i muanna te hon hih hat semsem ahih ziakin. I maban a bang thil hongtung ding hiam chih i thei kei a, Pathian a ki ngakna, Amah a ginna neih louh ngal i phut zoh ding omlou hi.

"...Muthei a pailou in, ginna in i paizaw zel uhi." - 2 Korinthte 5:7.

Simtute tengteng Toupa'n i thugelh te tungtawn in theihsiamna hon pia in hon vualzawl chiat hen.