Matthai 3:2 Kisik un! vangam a naita, chi'n, Judia gamdai ah thu gen in a hong pai a.
I changtel ahihleh, Baptistpa Johan tangkouna ahi. Johan ahihleh Hondampa Jesu Khrist' nnasepna lampi diing bawlsakpa ahi chih i thei hi. Ama'n Toupa Jesu Khrist lampi diing bangchi bawlsak hiam i chih leh, kisiikna thu mite kiang ah ana taangkoupih den a, kisiikna thu mah thuvaikhah pipen in ana nei hi. Kisiikna ichih chiang in, khelhna hinkhua a kipat kihei khia a, Pathian mai a kiniamkhiak a, Amah vaihawmna nuai a hing diing a kihei lut a kipiakkhiakna ahi.
Hotdam i hihtheihna dia poimoh masa pen khelh kiphawkna ahi chih i thei hi. Khelhna pen Pathian mohpaihsa ahihziak in, khial i hihlam i hong kiphawk chiang in dahna leh mangbatna in kidim hi. Huai mohpaihna a i suahtat theihna diing in khelh kiphawkna in kisiikna hon delhsak hi. Huchi'n kisiikna in Pathian hehpihna tungtawn in ngaihdamna hon pomsak a, i hong piangthakta hi. Piangthak ta, tup leh ngiim kichiantak nei a nungzuihna hinkhua i hon zat chiang in leng, huai kisiikna pen i sutzop touh zel diing uh ahi. Bangziak? Khial thei a khial kha zel i hih ziak un. Khelhna a omsung teng kisiikna a om diing chihna ahihlam chiamteh ni. Huai kawmkawm in, Pathian in a hehpihna tungtawn a ngaihdamna a hon piak pen, khelhna diing a phalna hi zenzen lou a, Sianthouna delhna a i zat diing hizaw ahihdan leng chiamteh poimoh petmah diing hi (Romte 6:15 & 22). Huai hehpihna i zat khelh leh, a thuak diing eimah kihi ahi.
Baptistpa Johan in kisiikna ana tangkoupih den a, huaidan mah in Toupa Jesu Khrist in khawvel a nnasep hon pat in, kisiikna mah hong tangkoupih masa pen hi chih Matthai 4:17 ah i mu hi. Huai kisiikna thu pen mah Sawltak te'n hon sunzom uhi (Nasepte 2:38). Gingtu leh nungzui hinkhua a taktak gam a zang diing chi i hih leh, kisiikna hinkhua i sutzop diing uh ahi chih hiai kan a gen diingdan om nawn tuanlou hi. I khelh khak veu unle kisiikna apoimohdan a taaklang na sa uhia?
A tawpna di'n hiai leng chiamteh lai ni: Kisiikna in Khasiangthou nnasep vaidawn a (Nasepte 2:38), Khasiangthou in nna hon sep chiang in i hihna di bangtak un hon gahkhesakta hi (Matthai 3:8 ; Galatiate 5:22-25).
Jesu Khrist mitsuan kawm ni maw, lawmte!
-Chingngaihlian TunglutJune 01, 2020/NH_10
(Laigelh toh kisai kupbeh nuam a om leh, +919892316430 ah laigelhtu thuzaak theih diing hi.)
Community Reflections & Thoughts (0)
No reflections posted yet. Be the first to share your heart.
Share Your Reflection