Kilaakna 1:7
Ngai in, meipi toh a hong pai hi; huan mi chiteng in amah a mu ding ua, amah sunten leng; huan leitung a nam tengteng in amah a kah ding uh. Hi ngei, Amen.
Jesu nungzui diktak i hi chih i ki chetna khat ahihleh, A hong kiknawn diing ngaklahna ahi.
I Hondampa a hong pai masak lai in mihingte tankhe di'n hong pai mahleh, a hong kiknawn chiang in zaw mihingte thutanna bawlkhum diing, belamte leh kelte khenkhe diing hi. Huai ni chiang in mi chih in i mu diing uhi.
Tunitan a hun lem bawlsak a om a, om tou zel lai a, mu utlou teitei a, kitheihmohbawl tengteng in leng huai ni chiang in mu diing uhi. Huai ni chiang in, Toupa Jesu Khrist Thupitak a ahong pai mu a kipahna mittui toh Amah ana kahte lak ah na pangkha diam ahihkeileh kisik a lah a kikheltaak ziak a mangbatna mittui toh kahte lak ah na pangkha zaw diam? Kivel pha dih! (2 Korinthte 13:5)
Khovel Kumpi leh Tanpa Van a kipat a, A thupina tengteng toh hong kum chiang a, michih in mu a, a mu khempeuh kiniamkhiak tak a A mai a khukdin leh kuun lou kuamah ki omlou diing hi (Philippite 2:10; Romte 14:11). Huai mun ah kibultuah mah lechin, kipahna genseng louh toh mel a mu kawm ngei in bia in na khukdin diing hia ahihkei leh, na tan tangtawn gawtmun a paimang diing a hon sawl ngak a khukdin na hikha maimah zaw diam? Hun om ahi. Kivel pha in!
Jesu Khrist mitsuan kawm ni maw, lawmte, A hong pai nawn i ngak sung un!
-Chingngaihlian Tunglut
May 05, 2020/NH_01
(Laigelh toh kisai kupbeh nuamaomleh, +919892316430 ah laigelhtu thuzaak theih diing hi)
Community Reflections & Thoughts (0)
No reflections posted yet. Be the first to share your heart.
Share Your Reflection